Sy het in Constantia in Kaapstad in die Wes-Kaap grootgeword, haar ma was ’n bekende model en haar pa is die broer van die ontslape Diana, prinses van Wallis. Lady Kitty Spencer woon deesdae in Londen, maar sy steel die kollig by modeweke van Milaan tot in New York.
Dié oudste dogter van graaf Charles Spencer en sy eerste vrou, Victoria Aitken, het in 1995 saam met haar familie na Suid-Afrika getrek. Toe haar ouers skei, het sy saam met haar ma en broers en susters in Suid-Afrika agtergebly. Vakansies het sy by haar pa in Engeland op die Althorpe-landgoed, die tuiste van die Spencers, deurgebring.
Kitty het aan die private skool Reddam House gematrikuleer en aan die Universiteit van Kaapstad gestudeer. Sy het ná haar studie aan die UK ook ’n meestersgraad in luukse handelsmerke aan die Regent-Universiteit in Londen verwerf.
