Covid-19 mag die kunste verlam het, dit mag teaters op grendel gehad het vir etlike maande, maar daar is geen keer aan kunstenaars se innovering nie.
Die Klein Karoo Nasionale Kunstefees (KKNK) bied van 13 tot 19 Desember nóg ’n digitale nuutjie vir die uitvoerende kunste aan. Dit omskep die gewilde kletsgroepe op WhatsApp om ’n nuwe platform vir teater te gee.
Die produksie Koeël deur die kerk is ’n komedie oor ’n familie se doen en late en speel oor sewe dae af in die aan- en afloop van ’n familietroue. Die paartjie wat die groot stap neem, is Ben Oppelt en Jani de Wet.
