Die permanente versameling van die Oliewenhuis-kunsmuseum in Bloemfontein is skynbaar so bodemloos soos die weduwee se kruik. Uit die versameling is al talle uitstallings met verrassende temas en indrukwekkende werke saamgestel. Geen wonder dus dat die gidse, almal kunsstudente of gegradueerdes, dit as ’n bron vir hul jaarlikse uitstalling gebruik.
Die titel transition • liminality • adaptation dui op hul vrae oor sukses as ’n kunstenaar. “Beteken dit ons moet ons oorspronklikheid en kreatiwiteit inperk ter wille van erkenning en aanvaarding in die visuele kunswêreld?”
Die uitstalling daag gevolglik die grense uit tussen vernuf en konformasie met ’n versameling kunswerke deur opkomende en gevestigde kunstenaars in verskeie media.
