Ná Nicolene Gibbons se fenomenale klavieruitvoering in November sien musiekliefhebbers met groot verwagting uit na haar volgende uitvoering in Bloemfontein.
Sy span hierdie keer saam met die violis Samson Diamond en tjellis Anmari van der Westhuizen vir ’n uithalerprogram van net twee werke, maar twee ankers in die klaviertrio-repertorium – Beethoven se Klaviertrio, op. 97, beter bekend as die Aartshertogtrio, en Schubert se Klaviertrio in E-mol majeur, op. 100.
Gibbons, ’n klavierdosent aan die Odeion Skool vir Musiek (OSM) in Bloemfontein, sê in die 30 jaar wat sy in Engeland gewoon het was sy ’n lid van ’n klaviertrio wat die Aartshertogtrio uitgevoer het, maar die Schubert-trio is vir al drie musici ’n eerste.
