Die superpopster Beyoncé het vanjaar die meeste Grammy-benoemings gekry en gaan met Adele, Harry Styles en ander musikante vir die topprys van album van die jaar meeding.
Beyoncé het altesaam nege benoemings ontvang. Dit bring die totale benoemings in haar loopbaan op 88 te staan en bring haar gelyk met haar man, Jay-Z, as die kunstenaar wat tot nog toe die meeste benoemings in die Grammy-geskiedenis ontvang het.
Haar dansalbum Renaissance gaan met Adele se album 30, Harry Styles se Harry’s House, Lizzo se Special en ander inskrywings van ABBA, Bad Bunny, Mary J. Blige, Brandi Carlile en Coldplay vir album van die jaar meeding.
