In die hartjie van die winter in ’n skuur van 8 m by 4 m in Worcester het die bekroonde teaterskepper Marthinus Basson onlangs rolprentregisseur geword. Die beligting was drie kerse, drie olielampe en ’n vuurtjie. ’n Tuinslang en lamp het buite vir die reën gesorg.
Basson skud nou nog kop oor alles wat binne ’n paar dae tydens die verfilming van Reza de Wet se Asem gebeur het. Hy vertel van ’n moordende program, akteurs wat papnat en in die yskoue nagte gewerk het, Tinarie Van Wyk Loots wat in die modder moes rondrol en klankmanne wat moes werk op deure wat op balke gerus het.
Die teaterprente, of dan die herverbeelde verfilming van die KKNK se vlagskipproduksies word eersdaags op Via uitgesaai.
