Die regisseur Marthinus Basson se produksie Die fel omstrede kroon van Edward II en Gaveston word binnekort in die Laboratorium-teater van die Adam Small-teaterkompleks in Stellenbosch opgevoer.
Die stuk, geskryf deur die Belgiese skrywer en dramaturg Tom Lanoye, het pas sy première op die KKNK gehad en die opvoering daarvan is deel van ’n inisiatief om teater na die Eikestad terug te bring. Dit is begin deur The Central Events and Conferencing Office (CECO) van die Universiteit Stellenbosch in samewerking met NovieGuide, ’n vervaardigingsmaatskappy en opleidingsplatform van Louw de Beer en die akteur Edwin van der Walt, asook Basson en Chris Pienaar se produksiemaatskappy Raminidam.
Volgens De Beer beoog hulle kwartaallikse aanbiedinge in die teater.
