Sy het gedink dis ’n grap toe sy die oproep van VIA ontvang. Sy het die foon neergesit en maar gewag om te sien hoe die grap uitdraai.
Dié “grap” het geblyk ’n hele R10 000 te wees uit dankbaarheid vir wat Liezel McLennan vir oud en jonk, mens en dier doen. McLennan is een van daardie aardse engele wat ingestel is op die nood van mense om haar. En dit is by haar dat VIA en Netwerk24 se dankie-sê-ketting in die 11de episode van Die Koevert eindig.
Dié ketting begin hierdie keer by die aktrise en rolprentvervaardiger Donnalee Roberts, wat huil as sy net Samaritan’s Feet noem, ’n organisasie in die Boland wat die uitdeel van skoene aan behoeftige kinders gebruik om by hul harte uit te kom.
