Suid-Afrikaanse tuiniers besef soms nie hoe bevoorreg hulle is nie, gesels dr. Ernst van Jaarsveld – meester-botanis,Volksblad-rubriekskrywer en Babylonstoren se hoof-tuinboukundige, soos ons deur die tuine van dié Kaapse plaas in die hartjie van die Drakenstein-vallei stap.
“Ons het omtrent 23 000 inheemse plantspesies om van te kies vir ons tuine – en daar is nog talle met die potensiaal om as tuinplante gekweek te word.”
Dit maak net sin om plaaslike plante te gebruik, verduidelik hy. Inheemse plante kos minder om te onderhou, hulle verg minder water, is reeds aangepas vir hul omgewing en benodig nie allerhande spesiale gifstowwe en chemikalieë om hulle teen peste en plae te beskerm nie.
