Vandag bring ek ode aan ons lieflike Ma Babs. Ons is so geseënd dat ons nóg ’n Moedersdag saam met haar kan vier en sy gaan vandag bederf word met gebakte lamsboud, gebakte aartappels, groenboontjies, Potgieter-slaai en haar gunsteling – krummel-appeltert met ’n skeppie roomys!
Ma Babs se boontjies
Babs het groenboontjies, wat sy in ons groot Wepener-tuin gepluk het, met ’n ou handmeule fyn gekerf. Die boontjies is saam met uie en aartappels gekook, gegeur met sout, witpeper en ’n groot stuk regte egte botter. Dit is vandag nog net so lekker, veral saam met ons Potgieter-slaai. Dié kombinasie het vir my ’n nostalgiese smaakbekoring.
