Elk gedrapeer in die Suid-Afrikaanse landsvlag het die erfenisaktivis Twin Mosia (37) van Petrus Steyn en twee ander gemeenskapslede van dié dorp in die Oos-Vrystaat tot in Bethlehem voetgeslaan.
Mosia, stigter en kurator van die Elandskop-museum op die dorp, en twee ander mans het vandeesweek ter wille van nasiebou en om mense se belangstelling in hul erfenis te prikkel sowat 80 km gestap.
Hy, Tumelo Mokoena, wat saam met hom by die museum werk, en Patrick Mokoena, ’n entrepreneur van die dorp, het Dinsdag om 02:00 begin stap en omstreeks 18:00 in Bethlehem aangekom.
