Amsterdam is ’n groot stad met ’n bevolking van byna 2,5 miljoen mense in die groter metropoolgebied. Ek het meer as 4 000 straatname in dié stad deurgelees op soek na straatname met ’n Suid-Afrikaanse verbintenis of stempel. My kortlys het aanvanklik 58 straatname gehad, wat ek na ’n netjiese 50 verminder het.
Van die straatname wat ek geskrap het (Rosendaal-, Veldhuizen-, Manenburg- en Saffierstraat) klínk wel Suid-Afrikaans, maar het nie ’n sterk teenwoordigheid in die republiek nie. Ek het agterna ook Hendrik de Bruyn-, Hugo de Vries-, Jacques Oppenheim- en Pieter Pauwstraat verwyder. Dit lyk dalk bekend, maar kom nie in Suid-Afrika voor nie.
Die idee van ’n kaart met Suid-Afrikaanse straatname het ontstaan toe ek op die sewende dag van my besoek aan Amsterdam toevallig verby Potgieterstraat stap.
