Die housewife van die Wynlande met die vuil mond, Anita Lloyd, gooi wal teen die bewering dat haar man, Boyce, sy toppos by KWV kwyt is oor haar manewales op die kassie.
Anita het die afgelope week benadruk dat Boyce uit vrye wil bedank het en nié afgedank is nie, het een van haar vertrouelinge aan Rapport vertel.
In wyn- en sakekringe word wyd gegis dat Boyce se vroeë aftrede (hy sou oorspronklik eers volgende jaar die leisels van die wynreus aan sy opvolger oorhandig) die regstreekse gevolg is van sy vrou se vulgariteit en gespog met hul rykdom. In waarskynlik ’n eerste vir ’n ernstige sakeblad in Suid-Afrika, het selfs die stugge Business Day die afgelope week oor die kaskenades op die stel van Die real housewives van die Wynlande berig.
