Pasiënte wat wag op lewensreddende ortopediese operasies by die Livingstone-hospitaal in Gqeberha moet maar vir pres. Cyril Ramaphosa bel met navrae of klagtes.
Hulle kan nie die operasies doen nie omdat geen inplantate of chirurgiese voorraad beskikbaar is nie, sê Jane Cowley, DA-woordvoerder oor gesondheid in die Oos-Kaap, in ’n verklaring.
Pasiënte wat na die hospitaal verwys word omdat hulle “nood- of dringende prosedures nodig het vir ’n ortopediese besering of toestand” kry ’n brief van die ortopediese afdeling waarin hulle ingelig word dat hulle nie gehelp kan word nie. Onderaan die brief is die nommers van die presidensiële hulplyn en die Oos-Kaapse departement van gesondheid.
