Bheki Cele, minister van polisie, het Maandag die omstrede diamantpakkieman Louis Liebenberg se bewering dat hy R5 miljoen by hom geëis en R200 000 in omkoopgeld van hom aanvaar het, ontken.
Cele het by monde van sy woordvoerder, Lirandzu Themba, gesê: “Daar’s g’n so iets nie.”
Liebenberg, die meesterbrein agter die Forever Diamonds and Gold (FDG)-skema, wat uit talle oorde daarvan beskuldig word dat hy ’n enorme ponzi-skema met die koop en verkoop van “diamantpakkies” bedryf, het die bewerings oor Cele Saterdag op ’n inligtingsgeleentheid vir sy “vennote” by Montecasino in Johannesburg gemaak, sonder om enige bewyse vir die aantygings te bied. Hy beweer “Cele se sekuriteitsman”, ene Mandla van KwaZulu-Natal, het hom verlede jaar in die nag na Midrand ontbied.
