Die proses om ’n tier van ’n kleinhoewe in Muldersdrift aan die Wes-Rand te verwyder, is deur die polisie en die Nasionale Raad van Dierebeskermingsverenigings (NDBV) begin nadat inwoners gekla het hulle vrees vir hul lewe.
Kapt. Troy Laas van die Muldersdrift-polisiekantoor sê hulle is Maandag – toe inwoners van die dier se teenwoordigheid bewus geword het – na die kleinhoewe waar die Siberiese tier aangehou word.
“Ons werk is om te verseker dat die dier nie ’n gevaar vir die gemeenskap inhou nie, dus het ons die hulp van die DBV ingeroep om die gebied waarin die dier aangehou word, te assesseer en seker te maak dat dit nie kan ontsnap nie. Die DBV was Woensdag op die perseel.”
