Onmin wat al jare lank broei in die Welkom Retirement Village kom tot uitbarsting in hofstukke in die hooggeregshof in Bloemfontein waar ’n voormalige bestuurder en voorsitter van die raad van dié oord vir bejaardes in Welkom verlede week tot ’n onwettige inwoner verklaar is.
Ou koeie oor gebeure van tot 13 jaar gelede is uit die sloot gegrawe en afgestof in bewerings van magsmisbruik, oneerlikheid, diefstal, nepotisme en selfs bedrog.
Waarnemende regter André Berry het in sy uitspraak gesê hoewel hy kennis neem van die lang geskiedenis van konflik tussen Beverley-Ann Shahia (72) en die raad, het hy nie te veel gewig aan die bewerings uit die verlede geheg nie.
