Familie bevestig oorsaak van Ainsley Moos se dood

Ainsley Moos (45), voorsitter van die Universiteit Stellenbosch (US) se raad, is dood weens komplikasies nadat hy narkose toegedien is.

Sy familie bevestig in 'n kort verklaring dat Moos Dinsdag "skielik en onverwags" oorlede is nadat hy 'n klein operasie aan sy mond by 'n kliniek in Stellenbosch ondergaan het.

Prof. Wim de Villiers, rektor en visekanselier van die US, het in reaksie op die nuus van Moos se dood gesê dit is ’n geweldige skok vir die universiteitsgemeenskap.