Gay pa’s ‘weer agter in tou’ ná hof hul nog ’n klap gee

Die Namibiese regering diskrimineer teen gay mense, maar gewone Namibiërs het nog nooit vyandig teenoor hom en sy man opgetree nie.

So het die Namibiër Phillip Lühl gereageer op die onlangse besluit deur sy land se hoogste hof om nie burgerskap aan die paartjie se kinders te gee nie.

Lühl en sy man, Guillermo Delgado, voer al vier jaar lank ’n stryd om die Namibiese howe te oortuig dat hul seuntjie, aan wie ’n surrogaat-ma in Suid-Afrika geboorte gegee het, as Namibiese burger erken moet word.