Londen. – “Dames en here, ons bied die sekskoningin van Suid-Afrika,” roep die aankondiger dramaties toe die gordyne oopskuif en Glenda Kemp, eens die soet dogtertjie van Swartruggens, al dansende op die verhoog kom.
Die toneel: die wêreldbekende Raymond’s Revue Bar, ’n ontkleedansteater in Londen se berug-beroemde Soho.
En toe Glenda verskyn galm die Vrystaat!-kreet uit vyf, ses verskillende plekke in die saal. Dit was eintlik dié uitbundigste applous dié aand vir die Swartruggens-nooi sonder klere.
