As die mense van KwaZulu-Natal in April ’n dag of twee vooraf gewaarsku is dat reuse-oorstromings kom, kon die helfte van die meer as 350 mense wat dood is, vandag nog by hul geliefdes gewees het, sê Dewald van Niekerk van die Noordwes-Universiteit wat ook hoof is van die Afrikasentrum vir rampstudies.
Hy het gereageer op die onthulling dat 17 uit die 34 poste in die provinsie se rampbestuursentrum vakant is. Volgens die lid van die uitvoerende komitee vir plaaslike regering, Sihle Zikalala, is die proses glo nou aan die gang om personeel aan te stel. Zikalala het dié inligting in die provinsiale wetgewer bekend gemaak in antwoord op geskrewe vrae van die DA se woordvoerder oor plaaslike regering, Martin Meyer.
Meyer sê die DA is erg bekommerd oor die stand van die rampbestuursentrum in die provinsie. “KwaZulu-Natal loop gereeld deur onder natuurrampe. Dít is veronderstel om die plek te wees waar al die ingrepe wat met sulke rampe verband hou, gekoördineer word,” sê hy.
