’n Telefoongesprek tussen twee likwidateurs enkele dae ná die sluipmoord op die bekende likwidateur Cloete Murray, en sy seun Thomas, maak wyd opslae.
Karen Keevy (50), wat vandeesweek as mededirekteur van Commonwealth Trust bedank het nadat die gesprek uitgelek het, sê in die gesprek aan Johan Engelbrecht, van Icon Insolvency Practitioners, hulle het almal geweet “dis net ’n kwessie van tyd” voordat iemand vir Murray leed sou aandoen.
Murray (57) en sy jongste seun, Thomas (28), wat saam as forensiese likwidateurs vir Murray se maatskappy Sechaba Trust in Pretoria gewerk het, was Saterdagmiddag 18 Maart in hul Toyota Prado na bewering op pad terug van ’n sakeafspraak in Johannesburg toe hulle op die N1-noord net verby die New Road-brug in Midrand aangeval is.
