Carel du Preez, die kêrel van Riana Pretorius wat ontvoer en ná tien dae ongedeerd vrygelaat is, wil ’n privaat speurder laat boet vir sy uitlatings op Facebook.
Die speurder Chris Breedt het verlede Saterdag op sy Facebook-blad beweer Du Preez is vir Riana se ontvoering in hegtenis geneem.
“Ek het reeds my regsverteenwoordiger opdrag gegee om ’n lastereis teen Chris Breedt in te stel en ek beplan om ’n klag teen hom by die regulerende owerheid van die private sekerheidsbedryf (Psira) aanhangig te maak. Sy optrede is totaal en al onaanvaarbaar,” het Du Preez aan Rapport gesê.
