’n Oudpredikantsvrou van die NG gemeente Stellenberg in Bellville is dood nadat sy op ’n staproete buite Barrydale beseer is. Haar man het egter vergeefs na haar gesoek omdat hy nie haar motor, wat na bewering by die parkeerplek naby die staproete gesteel is, kon vind nie.
Die stapper, Erna Gericke (66), en haar man, die oudleraar Bremer Gericke, was van 1981 tot 2017 die predikantspaar by die NG kerk Stellenberg. Hulle het in Barrydale afgetree.
Die kerk het Dinsdag in ’n e-pos gesê: “Dit is met groot hartseer dat ons bekend maak dat Erna Gericke, ds. Bremer Gericke (oudleraar) se vrou, op 21 Maart 2021 skielik van ons weggeneem is. Ons opregte meegevoel met Bremer en hul vier dogters, Florette, Karla, Magdel en Greta, asook hul skoonseuns en kleinkinders wat sy agterlaat. Geen reëlings rakende die roudiens is nog bekend nie.”
