Die boerbokke van Griekwastad is nie hierjy-bokke nie. Hulle is wêreldkampioene met name soos Maserati, Ferrari en Porsche en het ’n windgat-houding om dit te wys. Op die stowwerige vlaktes buite Griekwastad glimlag Lukas Burger van die Lukas Burger Boerbok-stoet breed as hy na sy boerbokramme in die kraal wys. Sy liefde vir boerbokke hoef nie in woorde beskryf te word nie. Dit straal. Anena Burger het by Lukas Burger gaan kuier.
Daar was al ’n Toeter, Nesquick, Boude, Kettie, Vlag, Knipmes en Mocha.
“Ag, ’n mens raak maar uit name uit jong. Ons sal byvoorbeeld ’n ram hê met die naam Hilux en dan is sy lam Toyota. Een van die dae as die luukse motors se name op is, begin ons seker weer by Volkswagen,” skerts Lukas Burger.
