Die regering se sogenaamde vervoermaand wat in Oktober die fokus laat val op herstelwerk aan die land se paaie, is volgens Vrystaat Landbou (VL) niks meer as politieke oëverblindery nie.
Boere en landbouverenigings in die Vrystaat moes steeds noodgedwonge self hand in eie sak steek om kritieke paaie te herstel.
Dr. Jack Armour, bestuurder: kommersieel van VL, sê die openbare geleenthede waar politieke uitlatings van transformasie en werkskepping gebruik word om skares op te sweep, maak geen verskil vir die gewone mense op straat of die landbou in die Vrystaat nie.
