Die regering se ondeurdagte besluit om slegs R60 per inenting te betaal gaan sy planne vir massa-inentings teen Covid-19 in die wiele ry, sê dokters.
Dr. Angelique Coetzee, voorsitter van die Suid-Afrikaanse Mediese Vereniging (Sama), sê dié besluit is belaglik omdat dit bloot nie vir dokters haalbaar gaan wees om hul praktyke as inentingspersele te registreer nie.
“Mense ouer as 60 is gevra om op die regering se elektroniese entstofstelsel (EVDS) vir koronavirusinspuitings te registreer vir fase 2 van die inentingsprogram. Die aanduiding is dat die regering slegs R60 per inenting sal betaal as ’n vaste tarief vir praktyke wat by die departement van gesondheid geregistreer is. Die R60-tarief geld vir alle praktyke wat as inentingspersele geregistreer is. Dit maak nie saak of dit apteke, dokters of verpleegsters is nie.” Die tweede fase sal na verwagting op 17 Mei begin wanneer die inenting van gesondheidswerkers (fase 1) hopelik afgehandel sal wees. Die fases kan moontlik oorvleuel.
