Staatspasiënte in Gauteng kan tot vyf jaar wag om sommige soorte operasies te kry en daar is ’n “verstommende” 36 237 pasiënte op ’n waglys vir operasies, sê Jack Bloom, DA-woordvoerder oor gesondheid in die provinsie.
Nomantu Nkomo-Ralehoko, die provinsie se LUR vir gesondheid en welstand, het dié syfers in ’n geskrewe antwoord aan hom gegee ná vrae van hom in die Gautengse wetgewer.
Die Chris Hani Baragwanath-hospitaal in Soweto het die langste waglys van 10 900 pasiënte; van wie 1 777 pasiënte vier jaar en vyf maande gaan wag vir heup- en knievervangings, sê Bloom in ’n verklaring.
