In ondersoeke na die dood van 29 mense nadat hulle met ’n Covid-19-entstof ingeënt is, is bevind dat dié sterftes nie met die inentings verband gehou het nie.
Florah Matlala van die Suid-Afrikaanse Gesondheidsproduktebeheerraad (Sahpra) het Vrydag op ’n mediakonferensie gesê die ondersoekkomitee oor entstofveiligheid (Nisec) het bevind dat die dood van die betrokke mense toevallig was.
Volgens haar kon ondersoeke na vier sterftes weens onvoldoende inligting nie afgehandel word nie, terwyl ’n verdere 20 sterftes nog ondersoek word.
