Die Wes-Kaap het ’n ooreenkoms ter waarde van $10 miljoen met die Amerikaanse regering gesluit om tuberkulose, MIV/vigs en Covid-19 in die provinsie te beheer.
Die ooreenkoms is tussen die ontwikkelingsagentskap USAid in Suider-Afrika, die Wes-Kaapse regering en die Amerikaanse regering onderteken.
Alan Winde, premier van die Wes-Kaap, het dié ooreenkoms Dinsdag op sy weeklikse aanlyn inligtingsessie bekend gemaak. Hy het hierin ook terugvoering gegee oor die vordering met die Covid-19-inentingsprogram, veral oor die lae inentingspersentasie onder Wes-Kapenaars in die ouderdomsgroep 50 jaar en ouer in verskeie dele van die provinsie.
