Die vermeende seksoortreder Gerhard Ackerman het na bewering ’n vuurwapen in die hande probeer kry omdat hy nie tronkstraf wil uitdien nie.
So het die hooggeregshof in Johannesburg Maandag gehoor nadat Ackerman Sondag deur die polisie in Florida, Johannesburg, aangekeer is.
Ackerman, wat op 740 aanklagte van onder meer verkragting en die verspreiding van kinderpornografie teregstaan, het nie Donderdag vir sy hofverskyning opgedaag nie omdat hy glo siek was. ’n Lasbrief vir sy inhegtenisneming is gevolglik deur die hooggeregshof in Johannesburg uitgereik.
