’n Oos-Kaapse man wat na bewering ’n lyk onder ’n bad in sy huis versteek het, sal vir eers in aanhouding bly nadat hy sy borgtogaansoek laat vaar het.
Die landdroshof in Butterworth het Vrydag gehoor Yibanathi MacGyver Ndema (43), wat op aanklag van moord en dwarsboming van die gereg teregstaan, sal nie om borgtog aansoek doen nie, het Luxolo Tyali, streekwoordvoerder van die nasionale vervolgingsgesag, gesê.
Ndema het op 1 September sy eerste hofverskyning gemaak nadat die polisie twee dae vantevore menslike oorskot onder ’n bad in sy huis op Butterworth gekry het.
