Die proses wat die spesiale parlementêre art. 194-komitee teen die geskorste openbare beskermer (OB) volg, is regverdig en word ingevolge die Nasionale Vergadering (NV) se reëls en regulasies hanteer.
Beweringe van ’n politieke “heksejag” en dat die DA alles in sy vermoë sal doen om van adv. Busisiwe Mkhwebane, die OB, ontslae te raak, hou nie steek nie.
Dit gaan nie hier oor politiek nie, sê adv. Ismail Jamie SC, wat namens Qubudile Dyantyi, voorsitter van dié komitee, en die speaker van die Nasionale Vergadering optree in die OB se jongste aansoek om ’n besluit van die parlement te laat tersyde stel.
