Terwyl die ontvoerde Riana Pretorius van Gqeberha al byna ’n week lank vermis word, het een van die twee mans wat kort ná haar ontvoering vasgetrek is in die hof verskyn.
Die 40-jarige Xolisile Rawutini het Maandagmiddag in die landdroshof in Gqeberha verskyn, maar is slegs van die onwettige besit van ’n vuurwapen en ammunisie aangekla.
Luidens hofdokumente word die saak as ’n bylae 5-misdryf hanteer en sal die staat borgtog teenstaan wanneer hy Vrydag weer verskyn om met ’n borgtogaansoek te begin.
