Samwu, die vakbond vir munisipale werkers, gaan die wysigings aan die Wet op Plaaslike Regering: Munisipale Stelsels – wat munisipale werkers verbied om op enige vlak politieke ampte te beklee – in die hoogste hof betwis.
Pres. Cyril Ramaphosa het die wysigings verlede jaar bekragtig. Politieke ampte verwys na die posisie van voorsitter, adjunkvoorsitter, sekretaris, adjunksekretaris of tesourier van ’n politieke party op nasionale, provinsiale, streek- of ander vlakke waarop die party funksioneer.
Papikie Mohale, nasionale woordvoerder van Samwu, sê hul prokureurs is besig om die hofstukke voor te berei wat binnekort by die konstitusionele hof ingedien sal word. Cosatu het gesê hy steun Samwu se besluit om die wysigings te betwis.
