Die uitspraak van die hooggeregshof in Makhanda (Grahamstad) dat Shell onmiddellik sy seismiese aktiwiteite aan die Wildekus moet staak, is as “ ’n massiewe oorwinning vir omgewings- en maatskaplike geregtigheid” geprys.
Regter Gerald Bloem het gisteroggend aan onder meer Sustaining the Wild Coast (SWC) toegegee Shell het sy plig versuim om geraakte gemeenskappe te raadpleeg voordat hy, as deel van ’n soektog na olie en gas, met sy seismiese aktiwiteite begin het.
SWC, verskeie gemeenskapsleiers van die Wildekus en All Rise, ’n groep omgewingsregslui, het vroeg vandeesmaand begin met regstappe om ’n dringende tussentydse interdik teen dié olie-en-gasreus te verkry.
