Die klagstaat in ’n dissiplinêre verhoor teen ’n Vrystaatse skoolhoof sluit in verskeie klagte van wangedrag, waaronder die seksuele mishandeling van manlike en vroulike onderwysers, intimidasie en dat hy die naam van die skool en van die onderwysdepartement in oneer gebring het.
Wium Uys (53), geskorste hoof van die Laerskool Truida Kestell in Bethlehem, se dissiplinêre verhoor was veronderstel om Maandag te begin, maar Howard Ndaba, woordvoerder van die departement, het Dinsdag aan Netwerk24 gesê dit is uitgestel omdat die voorsitter van die dissiplinêre verhoor siek is.
Uys is op 1 Februarie summier en onbepaald geskors.
