Die eienaars van ’n villa in Israel is vir nalatigheid in hegtenis geneem nadat ’n man in ’n sinkgat in hul swembad beland en dood is.
’n Egpaar van in hul 60’s, wat die eiendom in die sentrale dorp Karmi Yosef, 40 km suidoos van Tel Aviv, besit, is Donderdag in hegtenis geneem weens die vermoede dat hulle die 32-jarige man se dood deur nalatigheid veroorsaak het. Hulle het Vrydag in die hof verskyn en is weer vrygelaat.
Selfoonbeeldmateriaal van die voorval Donderdag wys mense in swemklere in en om die byna leë swembad wat geskok toekyk hoe die water in ’n groot gat wegvloei en opblaasvoorwerpe saamneem.
