Dit is noodsaaklik om so gou moontlik familie-ondersteuning vir die Dickason-doktersegpaar in Nieu-Seeland te kry en daarom werk die land se regering “hard daaraan” om familielede van drs. Graham en Lauren Dickason vanaf Suid-Afrika na dié land te neem.
Met dié woorde het Jacinda Arden, premier van Nieu-Seeland, Sondag tydens ’n mediakonferensie bevestig daar word reeds gekyk hoe om vir dié familielede plek te maak in die land se “MIQ” (managed isolation and quarantine)-geriewe, vir die verpligte 14 dae kwarantyn vir mense wat die land inkom.
Graham Dickason (44), ’n chirurgiese ortopeed, sy vrou, Lauren (40), ook ’n dokter, en hul drie dogtertjies, Liane (6), Karla en Maya (albei 2), het self net ’n week gelede uit hul kwarantyn-tydperk gekom en hulle in Timaru, Canterbury, op die Suid-eiland gevestig.
