Oekraïne se pres. Wolodimir Zelenski en sy vrou, Olena Zelenska, het op sosiale media onder skoot gekom oor hul voorbladfotosessie in die vrouetydskrif Vogue terwyl die oorlog in hul land voortwoed.
Sommige sosialemediagebruikers meen dit is in swak smaak omdat die oorlog tussen Rusland en Oekraïne reeds vyf maande aan die gang is en volgens die BBC reeds meer as 10 000 lewens geëis het.
Vroeër is berig dat die internasionaal bekroonde fotograaf Annie Leibovitz die egpaar vir die onderhoud, “Portrait of Bravery: Ukraine’s First Lady, Olena Zelenska”, vir die Oktober-uitgawe afgeneem het. Die fokus van die onderhoud is grootliks op Olena en die haar rol tydens die oorlog.
