Ná 46 jaar as ’n algemene praktisyn in Standerton in Mpumalanga was dr. Gerhard Herbst nog glad nie gereed vir aftrede nie.
En hy was nie lank by die huis nie, toe raak hy vreeslik verveeld. “Een dag is jy nog ’n groot padda in die dam en die volgende dag is jy niks. Jy kan net soveel keer kuier en dan het jy genoeg gekuier,” gesels die 76-jarige dokter oor die tyd ná sy aftrede in 2017.
Uitkoms vir die pensioenaris, wat ná sy aftrede na Pretoria verhuis het, het gekom toe die Atterbury Trust hom genader het om elke tweede Dinsdag van die maand by die Triomf-kliniek in die weste van Pretoria te kom uithelp. Die kliniek lewer sy dienste aan mense wat nie private mediese sorg kan bekostig nie. Hulle moet net ’n verwysing hê van ’n organisasie wat by die Atterbury Trust geregistreer is.
