Kort nadat haar tweejarige dogter na die kamer langsaan is, het Magda van Tonder (31) ’n bloedstollende gil gehoor. Sy het haar soontoe gehaas en haar bloed het koud geword: Die kamer was leeg, maar die venster was oop.
Toe sy by die venster uitkyk, het sy haar dogter bloeiend onder op die plaveisel gesien lê. Sy het sowat 2,5 m na benede getuimel.
’n Trampolien wat buite hul tweeverdieping-woonstel in Randburg gestaan het, het vermoedelik haar val ietwat gebreek. Magda vertel sy en haar man, Jonathan Pienaar (30), het aanvanklik getwyfel of Leah die val sou oorleef.
