Die sanger Adam Barnard se toestand is steeds baie ernstig, maar onveranderd, het sy broer, Louis, Dinsdag gesê.
Barnard, voorheen ’n lid van die sanggroep Romanz, is sedert voorverlede naweek in ’n koma. Hy ly al jare aan nierversaking nadat ’n niersiekte as kind by hom gediagnoseer is. Hy kry reeds geruime tyd nierdialise en het gehoop op ’n nieroorplanting.
Barnard se vrou, Almitra, het Saterdag in ’n plasing op Barnard se Facebook-blad gesê sy toestand was in Februarie die swakste nog, maar dat hy sy familie telkens verstom het. Toe hy onlangs weer vir ’n infeksie in die hospitaal opgeneem moes word, “was dit soos ’n rots wat hy moes dra”.
