Meer as 490 mense is oor ’n tydperk van vier dae in die Tuinroete in hegtenis geneem. Van hulle is 20 mense vasgetrek vir dronkbestuur, terwyl daar terselfdertyd op 329 liter drank en dwelms van derduisende rande beslag gelê is.
Die 494 inhegtenisnemings is van 19 tot 23 Januarie in dorpe van Oudtshoorn tot Stilbaai gemaak gedurende optrede om misdaad te bekamp. Onder die inhegtenisnemings is 77 weens dwelmverwante oortredings, 37 weens besit van gevaarlike wapens, 20 weens dronkbestuur, vier weens die verkoop van drank sonder ’n lisensie, 13 weens die besit van gesteelde goedere en agt vir wie lasbriewe vir inhegtenisneming uitgereik is. Die polisie het verder 276 Mandrax-tablette, 4 g Mandrax-poeier, 159 g tik, 1 g kokaïen en 329 liter alkohol gekonfiskeer.
Saterdag het die polisielede toegeslaan op ’n dwelmhuis in Steenbokstraat in Bridgton, Oudtshoorn. Dwelms ter waarde van R2 000 en R6 000 kontant is gevind. Vier mense tussen 32 en 52 is op aanklag van dwelmhandel in hegtenis geneem.
