Albertus Steenkamp, die pittige Hantam-boer wat in die gewilde TV-reeks Boer soek ’n vrou bekendheid verwerf het, word in die polisieselle in Calvinia aangehou nadat hy na bewering ’n plaaswerker met sy bakkie probeer omry het.
Steenkamp het Dinsdag vlugtig op ’n aanklag van poging tot moord in die landdroshof in Calvinia verskyn, sê Mojalefa Senokoatsane, woordvoerder van die Nasionale Vervolgingsgesag (NVG).
Hy is Maandag op sy plaas Perdekloof tussen Calvinia en Middelpos in hegtenis geneem, het sers. Timothy Sam, polisiewoordvoerder, bevestig.
