‘Ek weet nie moet ek raas of skree nie’ – ma van vermoorde konstabel

Haar ma is in November aan borskanker dood en in Januarie het beenmurg- en maagkanker haar broer en gewese man se lewe geëis.

“Ek het nog nie hul dood verwerk nie, so toe ek die nuus oor my oudste dogter se dood kry, het dit my gebreek,” sê Surita Arendse (43), wie se dogter konst. Shamielah Arendse (25) Dinsdagaand voor haar huis in Delft doodgeskiet is.

Arendse woon in Ladismith en het ook ’n 21-jarige dogter en 14-jarige seun. Sy sê Shamielah, wat twee dogters van vier en agt jaar oud het, sou volgende maand 26 jaar oud geword het.