Vermeende aanvaller doodgeskiet by kuierplek in Bellville

Die geveg om die beheer van die veiligheidsbedryf by Kaapse nagklubs het glo Donderdag gelei tot die dood van ’n vermeende sluipmoordenaar en poging tot moord op ’n uitsmyter by Buckley’s, ’n kuierplek in Edwardstraat, Bellville.

Bronne het aan Netwerk24 gesê daar is ’n stryd tussen Kaapse bendes – in dié geval die 27’s-bende en ’n faksie van die 26-bende – om beheer van die veiligheidsbedryf in Edwardstraat.

Kapt. Frederick van Wyk, polisiewoordvoerder, sê die voorval was Donderdag om 02:26.