Boekwurms is ontevrede omdat die provinsiale biblioteekdiens in die Wes-Kaap al sedert November vanlyn is.
Dit beteken dat boeke wat uitgeneem is, nie terug kan gaan op die rak nie en die beskikbare boeke al hoe minder raak.
Die Wes-Kaapse departement van kultuursake en sport sê die biblioteek-en-inligtingbestuurstelsel (Slims) is sedert 15 November vanlyn. Die stelsel word deur alle openbare biblioteke in die provinsie gebruik om onder meer rekord te hou van boeke wat uitgeneem en teruggebring word. Dit word deur die Staatsinligtingstegnologieagentskap (Sita) in stand gehou.
