Terwyl die kos van die mense van Piet Retief en Amsterdam weens kragprobleme en veral die Eskom-skuld in hul yskaste vrot, het die munisipale bestuur en hul gaste glo duisende rande se sjampanje en konjak op ’n peperduur strategiese werksessie by die see uitgedrink. En die belastingbetalers het daarvoor betaal.
Inwoners van dié dorpe in Mpumalanga is woedend hieroor. Afgesien van Eskom se gewone beurtkrag, pas die Mkhondo-munisipaliteit ook sy eie roterende beurtkrag toe. Dorpenaars sit ure sonder krag, en die inwoners van Amsterdam het op sommige dae net vier uur lank krag.
Die munisipaliteit skuld Eskom R341 miljoen en die kragvoorsiener is glo nie bereid om sy kapasiteit van 18 MVA te verhoog tensy die munisipaliteit sy skuld vereffen nie.
