Die N.A. Smit-swembad in Oudtshoorn is reg om (weer) beide atlete en die publiek te ontvang.
So sê die Oudtshoorn-munisipaliteit nadat daar die afgelope twee weke hard agter die skerms gewerk is om die swembad gereed te kry vir tweekamp-uitdunne wat Dinsdag gehou is om ’n span vir die Eden-distrik te kies wat op 31 Oktober aan die tweekamp-kampioenskap in Gqeberha gaan deelneem.
Die munisipaliteit het onlangs onder kwaai kritiek deurgeloop omdat die gewilde Freda Barnard-swemgala vandeesmaand die eerste keer by die Conville-swembad in George gehou is nadat dit die vorige 40 jaar in Oudtshoorn plaasgevind het. Meer as 600 deelnemers van oor Suid-Afrika heen het deelgeneem en dit is as ’n groot sukses bestempel. Die gala het in vorige jare ’n gesonde ekonomiese inspuiting aan Oudtshoorn besorg.
